Tuesday, December 5, 2006

شبكة واحدة بتسرقنا كلنا


المشهد الأول : سنترال الهرم
أنا : السلام عليكم كنت عاوز أدفع الفاتورة
الموظفة : أنا آسفة الخدمة دي مش بنقدمها في السنترال
أنا : خدمة إيه انا مش عاوز اي كماليات انا عاوز ادفع فلوس المكالمات
الموظفة : روح ادفع في سنترال الجيزة .ياللا يا استاذ . اللي بعده
عيني لمحت وانا خارج الشعار الجميل:

شبكة واحدة بتقربنا كلنا


المشهد الثاني : سنترال الجيزة
أنا : السلام عليكم كنت عاوز أدفع الفاتورة
الموظفة : انا آسفة الشبكة عطلانة وبيحاولوا يصلحوها
أنا : (بعد نصف ساعة) لسة ماتصلحتش
الموظفة :لا لو مستعجل ممكن تروح تدفع في سنترال الدقي
بصيت بغيظ وانا خارج علي الشعار :

شبكة واحدة بتقربنا كلنا


المشهد الثالث : سنترال الدقي
أنا : السلام عليكم كنت عاوز أدفع الفاتورة
الموظف : انا آسف الشبكة عطلانة وبيحاولوا يصلحوها
أنا : ماهي في سنترال الجيزة عطلانة برده وقالولي ادفع في الدقي
الموظف : يا أستاذ .... هي كلها شبكة واحدة
بصيت للوحة الكبيرة المعلقة خلف الموظف :

شبكة واحدة بتقربنا كلنا
فعلا شبكة واحدة بتعطلنا كلنا
شبكة واحدة بتستغلنا كلنا

6 comments:

البراء أشرف said...

منور المدونات يا عم سامح.. تدوينة حلوة فعلا..

بس تعرف.. الحل الوحيد مع الشبكة اياها هي انك تنفضلهم وتبطل تدفع خالص ويرفعوا هما الخط وتخلص مكالماتك من موبايلك احسن.. دي شبكة (****) لا مؤاخذة

سامح البرقي said...

ده نورك يا حج براء
بالنسبة للحل المقترح فيه مشكلتين:
1-بيتي هايتخرب اكتر من الفواتير
2-الشبكتين بتوع الموبيل انيل من بعض
مش كدة ولا ايه؟؟؟ علي راي فؤاد المهندس الله يرحمه

Anonymous said...

عم سامح

الف مليون مبروك على البلوجر

يا سيدي عاوزين نشوف ايام الشقاوالعذاب والقاعدة على القهوة
وحكايات كتيرة نستمتع بها

بالنسبة لفواتير

بلد فواتير صحيح

احسن حاجة روح سنترال العجوزة ولا اقول لك سنترال مصر الجديدة عمره ما يعطل ابدا
يعطل ازاي وهو جبن الباشا
بصحيح هو الباشا بيدفع فواتير

اخوووووووووك

مجااهد

ahmad hamdy said...

الف مبروك يا برقوقى
ومنتظرين منك مجهود ضخم وكلام كبير
مع انى من اول ما عرفتك وانت مشغول
علطووووووول مشغول مشغول
ربنا معاك
تحياتي يا جميل
احمد حمدى
:)

أحمد أبوسيف said...

انا مريح دماغى يا اما بأدفع الفاتوره من على النت بالكريديت
أو ابويا ربنا يكرمه ويديله الصحه بدفعل لنا كل الفواتير وساعات بأدفع له وساعات بأطنش

koukou el kemil said...

انا بقالي ست شهور او اكتر حطه
dsl و لسه بيجيلي فلوس المفروض تدفع في خانة النترنت المجاني في الفاتوره
شوف انت بقي
lol